لو شاطر تعرف تعيش في مصر ب 1000 في الشهر

لو شاطر .. تعرف تعيش فى مصر بـ 1000 جنيه فى الشهر !!!

شر البلية ما يضحك .. وأكثر من ينطبق عليهم ذلك هم نحن المصريين .. فلا تخرج من أقوى المواقف الساخرة إلا فى أوقات الشدة والضيق .. ربما للسخرية من الموقف أو لتخفيف حدة الموقف أملاً فى تلاشيه .. وليس أدل على ذلك من هذه النصيحة التى يقدمها أحد المصريين لإخوانه فى الظروف الإقتصادية التى تمر بها مصر حالياً والتى انتشرت فى المنتديات العربية وخاصة المصرية :

بيان المصروف اليومى والشهرى :

- عيش بلدي : 1 جنيه يومياً = 30 جنيه شهرياً
(بس لازم تلحق دورك فى طابور الفرن وتلحق شغلك فى نفس الوقت ربنا معاك )

- حليب : 4 جنيه يومياً = 120 جنيه شهرياً( عدد واحد لتر يومياً ويارب ميطلعش بودرة سيراميك ويكفى العيال )

- فول : 8 جنيه إسبوعياً = 32 جنيه شهرياً( كيلو فول اسبوعيا يعنى 125 جرام يوميا رضا والحمد لله )

- جبنة بيضاء : 20 جنيه إسبوعيا ً= 80 جنيه شهرياً( كيلو في الأسبوع 125 جرام يوميا انت عايش )

- بيض : 5 جنيه إسبوعياً = 20 جنيه شهرياً
( عبارة عن 10 بيضات فى الاسبوع يعنى لو اربع افراد يبقى بيضه ونص يومياً للأربعة أفراد )

- خضار : 10 جنيه إسبوعياً = 40 جنيه شهرياً
( عبارة عن صنف واحد بس + كيلو طماطم + ليمونه وحزمة جرجير أسبوعيا )

- فاكهه : 5 جنيه إسبوعياً = 20 جنيه شهرياً( عبارة عن كيلو برتقال أو قشر موز مرة أسبوعيا عشان العيال تفتكر إسمه )

- شاى : 10 جنيه شهرياً
( لزوم الكيف اللى بيذل والضيوف الرزلين )

- سكر : 4 جنيه إسبوعياً = 16 جنيه شهرياً( عدد واحد كيلو أسبوعيا .. لزوم الكيف اللى بيذل والضيوف اللى معندهمش دم )

- أرز : 4 جنيه إسبوعياً = 16 جنيه شهرياً( عدد واحد كيلو أسبوعيا للعائلة كلها .. يعنى 125جرام يوميا للأسرة ومتوسط الفرد 40 جرام )

- زيت طعام : 10 جنيه إسبوعياً = 40 جنيه شهرياً( لتر اسبوعيا علشان تشرب بق على الريق يزيت معدتك ويستعمل كبديل للخضروات )

- مكرونة : 8 جنيه إسبوعياً = 32 جنيه شهرياً( عبارة عن عدد 4 كيس 400 جرام أسبوعيا .. خلى العيال تنبسط )

- دجاج : 20 جنيه إسبوعياً = 80 جنيه شهرياً
( عدد واحد دجاجة أسبوعيا للعائله .. أظن معقول )

- لحم : 30 جنيه إسبوعياً = 120 جنيه شهرياً( عدد واحد كيلو لحم أسبوعيا لزوم صنف الخضار والليمونه وحزمة الجرجير.. ألف هنا وشفا )

- بقوليات : 10 جنيه شهرياً( عبارة عن كيلو واحد بس شهريا ونقى اللى بتحبه براحتك .. عدس - لوبيا - فاصوليا )

- توابل : 10 جنيه شهرياً( عبارة عن دقيق + ملح + كمون + فلفل + كسبرة + وممكن تديها خل براحتك )

- صابون : 15 جنيه شهرياً( عبارة عن صابونه واحدة للحمام + صابون مواعين + مسحوق للملابس ( النظافة عموما )

- مواصلات : 2 جنيه يومياً = 60 جنيه شهرياً( بعد طابور الفرن تركب أتوبيس الهيئة ذهاب وعودة وبهدله لفرد واحد يوميا )

- حلاق : 10 جنيه شهرياً( عبارة عن حلاقة الشعر + ماكينات حلاقة الذقن ( طبعا متنساش انت جبت صابونه للحمام هى هى الصابونه اللى هتحلق بيها دقنك ( نعيما ياباشا )

- مصروفات مدرسية : 10 جنيه إسبوعياً = 40 جنيه شهرياً( عبارة عن مصروفات المدرسة + مصروف العيال اليومى + كراسات وأقلام وجلاد ... إلخ )

- دكتور : 30 جنيه شهرياً( نمرض بالدور طبعا .. عدد أربعة أفراد × مرة واحدة للفرد كل 4 اشهر وربنا يستر )

- أدوية : 50 جنيه شهرياً( أكيد طبعا العلاج بالدور وربنا يستر واثنين ما يمرضوش فى وقت واحد .. تبقى كارثة )

- فاتورة التليفون : 10 جنيه شهرياً( اشتراك الهيئة فقط .. هنرد بس ومش هنتكلم .. ماعدش ينفع كلام )

- فاتورة المياه : 10 جنيه شهرياً( للأسف ده لو فلوسك على أدك ويبقى لازم تشرب مياه ملوثة بالمجارى )

- فاتورة الغاز : 5 جنيه شهرياً( الحمد لله .. غاز طبيعى .. الله يكون فى عون اللى عنده أنابيب (10 جنيه للأنبوبة) وممكن تطلع فاضية )

- فاتورة الكهرباء : 20 جنيه شهرياً( لمواكبة التطور .. غساله ملهاش مسحوق .. تلاجة فاضية .. بوتجازيستخدم مرة كل أسبوع )

- قمامة : 10 جنيه شهرياً( ودى إجبارى طبعا ومن الواضح إن العيشة دى ما فيهاش أكل أساساً .. يبقى القمامة هتيجى منين ؟ )

- بواب : 15 جنيه شهرياً( ماهو من حقه يعيش هو كمان .. لو عشرشقق يبقى 150 جنية شهريا .. خليه يهيص )

- صيانة : 30 جنيه شهرياً( لإصلاح الأجهزة بالدور .. غسالة - سخان - بوتوجاز - مروحة - ثلاجة - سباكة - لمبات إنارة .. الخ )

- ملابس : 100 جنيه شهرياً( عبارة عن الصيفى والشتوى داخلى وخارجى واحذية وشرابات وكلونات واتصرف بقى )

-----------------------------------------
الإجمـالى : 1081 جنيه شهرياً
----------------------------------------

أكيد اللى ها يخليك تعرف تعمل الكلام اللى فوق ده ها يخليك تتصرف وتضغط مصروفاتك شويه علشان تبقى الحسبة 1000 جنيه بس .. أقولك نصيحة ؟ : ما تمرضش وما تخدش أدوية وشيل 80 جنيه معلش ربنا يقويك وينصرك على من يعاديك ويكفيك شر المرض

إيجار الشقة طبعا قانون جديد وللأسف مالهوش قانون .. كل واحد وبخته .. ومش ها نحسبها كل واحد يقعد عند أمه .

عيد الكحك ( عيد الفطر).. الكحك ضر ومالهوش لازمة

عيد اللحمة (عيد الأضحى) .. اللحمة مضرة ومالهاش لازمة

حلاوة المولد (المولد النبوى) .. السكر مضر ومالهوش برضه لازمة .. ولو على الحلويات رمضان كريم وخيره كتير

أخ خ خ نسيت احسب زكاة الفطر بس مش عارف هادفعها ولا هاخدها ؟

عموما هاقولكم على قائمة الممنوعات والمحظورات .. متقربوش منها علشان تعرفوا تكملو الشهر

ممنوع .. الحلاوة والمربى والعسل والزبدة وكافة أنواع الجبن عدا ما ذكر فى التعيين ( الجبنة البيضا )
ممنوع .. المعلبات .. تونه - بلوبيف - لانشون - سالمون – فول - وطبعا البسطرمة والزيتون والمخللات

أوعى قلبك يحن لعيل من العيال وتجيبله شيبسى ولا بيبسى أو كراتيه ونايتى ولاعسلية ولا بسكوت ولا شيكولاته .. إياك ومنتجات العيال الصغيرين حتى لو حليب بالفواكه أو لبان وجيلى كولا وهوهوز .. حتى الشيتوس يتفرج على الكرتون بتاعه فى التليفزيون ومتخليهوش يتفرج على الاعلانات بين الفاصل

ممنوع اللحوم بأنواعها .. البوفتيك والاستيك والرقبة والموزة واللوزة كله كلام فاضى خليك فى تعيينك الاسبوعى .. ومتنساش ان البانيه والفيليه من الممنوعات .. وماتقربش وماتمشيش فى الشارع جنب كنتاكى وهاردييز وهاربيز وتكه ومؤمن وكوك دور .. وإياك من السندوتشات عموما زى الطعمية والبطاطس والباذنجان والحاجات الحلوة دى مش مطلوبه تعملك حموضه وهتحتاج فوار وإحنا ماعملناش حسابه فى مشتروات الدوا .. وطبعا مش محتاج أقولك وافكرك انك ممعكش فلوس علشان يبقى نفسك فى سندوتش فرنساوى مليان كبدة اسكندرانى ولا مخ .

خليك واقعى وانسى المحمر والمشمر واللب والسودانى والتسالى بانوعها والمحمصات والمقرمشات والمكسرات بأنواعها .. بالعربى أنت زى العصفورة تاكل عيش ودنيبة رز وتشرب ميه .. عمرك سمعت عن عصفورة ركبت دش أو وصلت نت او حتى فكرت تاكل ترمس او تشرب حمص كله كلام فاضى ممنوع ياسيد

اهم حاجة ماتروحش لدكتور ومتجبش مدرس ولا ادوية وإياك من المعجنات زى البيتزا والفطائر ومش محتاج افكرك ان البسبوسه والجلاش والكنافة والقطايف والجاتوة والشاتوة والتورت وام على وصوابع زينب ورموش الست والكحك والغريبة ممكن تستغنى عنهم

طبيعى انك مش هتقرب من الفواكه خالص زى البرقوق والمانجو والبطيخ والفراوله والكيوى والخوخ والعنب والتفاح حتى الكاكا والحرنكش والنبق والقصب والدوم والتوت .. كل ده ممنوع سيادتك

وطبعا معجون الاسنان والحلاقة والشامبو والبلسم كلها رفاهيات ماليكش فيها زى البصل والتوم والبطاطس كلها أساسيات ماليكش فيها برضه .. وماتنساش تبعت الميل للناس اللى تعرفهم هما اكيد زيك محتاجين شوية نظام مش اكتر هما غلابة .. وفكرهم يقولوا لعيالهم لو شافوا مسلسل فى التليفزيون مليان بهرجه إن دى قصص خيالية كانت فى العصور القديمة فترة من الزمن .. وإن الواقع زى ماهما شايفيينه دلوقتى .

حتى الإعلانات حاولوا تفهموهم إنها مجرد ألوان مبهرة وتكنولوجيا فى علم التصوير وتخيلات .. ممكن تحصل بعدين فى يوم ما .. زى ماحصل فى امريكا وكندا وفرنسا والمانيا واوروبا كلها .. وان الحاجات دى علشان لما الناس دى ييجوا عندنا يلاقوا منها ويعرفوا يعيشوا .. وإن الحاجات دى مش لينا .. دى ليهم هما .. هما أصحاب البلد ولازم ينبسطوا .

عموماً لو على الكلام .. الكلام مش ها يخلص .. روح بقى الحق طابور العيش لايفوتك .. تبقى مصيبة لو انا اللى عطلتك ورحت لقيت الفرن شطب .. وتقعد طول اليوم تدعى عليا .. واحنا مش ناقصين حد يدعى علينا .. إحنا اللى فينا مكفينا .

موضوع: ياعم فيجا الإثنين أبريل 14, 2008 4:11 pm

[size=18][/size]
فين الخضار الحسبة حلوة وكل حاجة بس فين الخضار
الخضار بقي اغلي من اللحمة يعني ها نعمل ايه ناكل خضار مرة واحدة في الشهر والا ايه وضح ؟؟؟

مشكور اخ مسلم علي مرورك الكريم علي الموضوع وبالنسبه للخضار يا اخي متدققش قوي ده اصبح كماليات ممكن تستغني عنه او ممكن تبقي تعدي علي بتاع الخضار تتفرج عليه يجي ربع ساعه وتروح كانك اكلت خضار هههههههههههههههههههه
:D

ايه ده يا اخي مسود الدنيا ليه ربنا بيرزق عباده من حيث لا يدرون الحقيقة الغلاء صار كارثة ومصيبة بس لا تسودها للدرجة دي
ربنا كريم والله يلطف بالابرياء

موضوع: انا ناويه اصوم الأحد مايو 04, 2008 8:44 pm

كفايه اوى عليا الزبادى فى السحور وفى الفطار فيشاااااااااااااااااااااااااااااااار بالماجى هههههههههه ولا ايه؟
كده ممكن نعيش معقولين شويه Mad

بس يارب نلاقى حق الفيشار والزبادى والخيااااااااااااااار
هههههههههههههههههه وبالمره يافيجا انت صح الاةةةةةةةةةةة دى مش غريبه فعلا Rolling Eyes

وربنا يعيننا يااااااااااااااااااااااااااارب ونقدر نقف على رجلينا لان مع الصيام التفكير بيزيد والصحه معادتش مساعده خالص

مشكوووووووووووور فيجا عالحسبه دي بس ياريت اصلا يكون الدخل الف جنيه
انا عن نفسي زي ندا هقضيها صيام في السحور فيشار والفطار برده فيشار (الزبادي اغلي من الفيشار) هههههههههههههه توفير برده